Med Mirra tek Benedicte Maurseth publikum med inn i villreinens liv og årssyklus på Hardangervidda. Musikken følgjer dyret gjennom årstidene – frå vinter og vår, via sommarbeite, til haust og ny vinter.
Utgangspunktet er norsk folkemusikk, med gjentakande mønster og eit ope, lyttande uttrykk. Lydar frå villreinen sjølv er vevd inn i musikken og gir konserten eit tydeleg preg av landskap og natur.
Mirra er oppfølgjaren til Hárr (2022), som vann Nordic Music Prize. I 2025 blei Mirra kåra til årets beste album i Vestland av Bergens Tidende.
Konserten er ein del av turnéordninga Den musikalske stamvegen (Vestnorsk jazzsenter), og blir arrangert i samarbeid mellom Førdefestivalen og Jølster Jazzklubb.
