Jawa | Syria

Den vakre og spirituelle sufi-musikken har hatt tronge kår under krigen i Syria. Men det musikalske ensemblet Jawa nektar å la den musikalske arven deira forsvinne. Dei har gjort det til sitt oppdrag å ta vare på, men også fornye sufimusikken. 

Trufast mot tradisjonen har musikarane i Jawa med seg ein dansar på scena – dervisjen Hatem Al Jamal.  Som sine forgjengarar praktiserer han den spirituelle danseforma der ein, kledd i eit langt skjørt, utfører gjentekne, roterande rørsler i ei symbolsk etterlikning av planetar som kretsar rundt sola. Dansen  er ein vanleg meditasjonspraksis, der dervisjar søkjer å nå kjelda til det fullkomne. 

Sufimusikken vart opphavleg framført a cappella. Jawa har likevel med seg instrument på scena, som luttinstrumentet oud, den sitarliknande qanun og langfløyta nay. På denne måten gjer dei den tradisjonelle sufimusikken til sin eigen, og let den klinge på nytt på tvers av generasjonar og landegrenser. For Jawa handlar det nemleg ikkje berre om å ta vare på dei musikalske tradisjonane i sufismen, men òg om kulturell og spirituell motstandskraft. Gled deg til ei vakker musikalsk oppleving med syriske røter når ensemblet går på scena i Førde!

Khaled Alhafez - vokal  

Akram Ben Romdhane - oud  

Youssef Nassif - qanun  

Tammam Alramadan - nay, kawala  

Simon Leleux - perkusjon  

Marwan Fakir - fele  

Hatem Al Jamal - dervishdansar