Gasper Nali Band | Malawi

Gasper Nali har vore litt av eit internettfenomen sidan 2015, då ein gammal video av songen hans «Abale Ndikuwuzeni» gjekk viralt på YouTube, Facebook og Twitter, og har passert 20 millionar visingar.

Som barn hadde Gasper band med dei to brørne sine. Dei reiste rundt og spelte. Først var han den som samla inn myntane, seinare fekk han også spele. Då han mista begge brørne i 2002, heldt han fram som einmannsband og spelte på sin sjølvlaga babatoni. Han spelar med ein pinne i eine handa og i den andre ei tomflaske, brukt som ein gitarslide. Rytmen kjem frå ei kraftig basstromme trekt med kuskinn, driven av ein avansert fotpedal. Resultatet er ein intens og drivande lyd, som fyller rommet aleine.

Videoen i 2015 gjorde at Gasper fekk kontakt med musikkprodusenten Mattias Stålnacke, og fekk songen ut på Spare Dog Records. Sidan har han gjeve ut to kritikarroste album, turnert verda rundt, og fått ein global fanskare. Og no kjem han for første gong til Noreg.

Gasper sin musikk har røter i Kwela-tradisjonen, ein musikkstil som oppstod i Sør-Afrika først på1900-talet, der lokale musikktradisjonar vart blanda med musikken til malawiske innvandrararbeidarar. Seinare kom stilen tilbake til Malawi med musikarar som vende heim.

Gasper har teke denne arven vidare, og forvandla babatonien til eit akkompagnerande instrument, og sjølve motoren i ein heilt unik musikalsk stil.

Gasper Nali – babatoni, vokal

Luhangah – perkusjon, vokal

Mattias Stålnacke - gitar